ExpoCoruña acollerá desde mañá, e ata este xoves, o congreso de ASEICA, un dos foros sobre investigación en oncoloxía máis relevantes do mundo e organizado pola Asociación Española de Investigación sobre o Cancro.

O encontro conmemora este ano a súa 18 edición, coincidindo ademais co 40 aniversario da asociación. Un evento que reunirá a uns 500 profesionais do ámbito científico e que, sen dúbida, reforzará aínda máis a posición da Coruña como un dos principais destinos de turismo MICE a nivel nacional ao xerar un impacto positivo de gran magnitude non só a nivel económico, senón tamén de vinculación da cidade con importantes avances científicos.

A Coruña, punto de encontro para expertos en investigación do cancro

O congreso contará con profesionais nacionais e internacionais que desenvolven o seu traballo en universidades, centros de investigación ou hospitais. Así, a xornada inaugural contará coa presenza de Marisol Soengas, do Centro Nacional de Investigacións Oncolóxicas (CNIO) e presidenta da ASEICA, Rafael López, do Complexo Hospitalario Universitario de Santiago de Compostela, Luís Paz-Ares, do Hospital Universitario 12 de Outubro de Madrid, Joan Massagué, do Memorial Sloan Kettering Cancer Center de Nova York, Vitoria Sanz-Moreno, do Institute of Cancer Research de Londres, Mitchell Levesque, do Hospital Universitario de Zúric e máis investigadores de países como Holanda, Alemaña, Francia, Israel, Estados Unidos ou Italia.

Haberá diferentes conferencias, mesas redondas, flash talks ou un concurso fotográfico, entre outras actividades, onde se porá o foco no desenvolvemento e innovación de técnicas de estudo e traballo en relación á detección precoz do cancro e os seus tratamentos.