O Palacio Municipal de María Pita acolleu este martes a presentación do congreso Techsportnow, un evento sobre deporte, innovación e intelixencia artificial. O concelleiro de Cultura e Turismo, Gonzalo Castro, participou no acto, incidindo en que "o Goberno de Inés Rey está impulsando numerosas iniciativas vinculadas ás novas tecnoloxías e á aplicación da intelixencia artificial, que tiveron como xerme a instalación na cidade da AESIA". Castro estivo acompañado do presidente de Agaxede e director do congreso, Eduardo Blanco.

A primeira edición deste congreso celebrarase este 21 e 22 de novembro no paraninfo da Universidade da Coruña. Está organizado pola Asociación Galega de Xestión Deportiva (Agaxede) e conta co apoio do Concello da Coruña. Durante ambas xornadas participarán 20 poñentes expertos en IA aplicada ao deporte procedentes de España, Portugal e Latinoamérica, destacando a presenza de Alejandro Blanco, presidente do Comité Olímpico Español e Ignasi Belda, director xeral da AESIA. Ata o de agora hai máis de 300 persoas inscritas.

O programa do congreso estrutúrase ao redor de catro bloques temáticos:

• IA para o Rendemento Deportivo: ferramentas para optimizar o adestramento, previr lesións e personalizar procesos.
• Novidades da IA no Deporte: Comunicacións e presentación de proxectos e experiencias innovadoras con IA no deporte.
• A IA no futuro do Fitness: A comunicación do presente e futuro e innovacións da I.A. no sector do Fitness.
• A IA na Dirección e Xestión Deportiva: solucións para as decisións estratéxicas baseadas na análise de datos, equipamentos e infraestruturas, a seguridade e a mellora de servizos e procesos.

O congreso combina relatorios, mesas redondas e comunicacións para ofrecer unha visión da relación existente entre o deporte e a tecnoloxía.