O Coliseum da Coruña acollerá nas vindeiras semanas o espectáculo 'Corteo' do Circo do Sol, unha das producións máis recoñecidas a nivel internacional da compañía canadense, que chega á cidade no marco da súa nova xira por España.

Con trece funcións programadas entre o 24 de abril e o 4 de maio, a acollida do público coruñés e galego foi excepcional desde a apertura da venda xeral de entradas. O Concello informa de que quedan xa as últimas entradas dispoñibles, polo que se recomenda a súa adquisición canto antes para non quedar sen elas.

'Corteo', que significa "cortexo" en italiano, propón unha viaxe onírica a través da imaxinación dun pallaso que soña o seu propio funeral nun ambiente festivo e teatral, entre o ceo e a terra. Trátase dun espectáculo que combina acrobacias, humor e poesía visual e que xa foi visto por máis de dez millóns de persoas en todo o mundo.

As entradas están á venda na web oficial do Circo do Sol, así como nos portais de Live Nation, Ticketmaster, El Corte Inglés e Ataquilla, e tamén no despacho de billetes da praza de Ourense.

Horarios das funcións en A Coruña:

• Xoves 24 de abril - 20.30 h
• Venres 25 de abril - 20.30 h
• Sábado 26 de abril - 16.30 h e 20.30 h
• Domingo 27 de abril - 16.30 h e 20.30 h
• Mércores 30 de abril - 20.30 h
• Xoves 1 de maio - 20.30 h
• Venres 2 de maio - 20.30 h
• Sábado 3 de maio - 16.30 h e 20.30 h
• Domingo 4 de maio - 12.30 h e 16.30 h

O Goberno municipal celebra a chegada dun evento cultural desta relevancia internacional á cidade e anima á cidadanía a non perder a oportunidade de gozar dunha das experiencias escénicas máis impactantes do panorama actual.