A Coruña acolleu hoxe a primeira xornada do 36º Congreso Nacional de Diabetes, reunindo na cidade a uns 1.500 profesionais baixo o lema 'A diabetes conéctanos, intercambiando experiencias'. É a primeira vez que A Coruña acolle esta cita científica, a máis importante de fala hispana no ámbito da diabetes.

Investigadores, médicos, profesionais da enfermería, educadores ou psicólogos participarán desde hoxe e ata o venres 25 nas distintas conferencias e talleres que se impartirán nas instalacións de PALEXCO, aínda que tamén se desenvolverán accións paralelas o día 26. Ademais, nesta ocasión, os pacientes poderán acceder a unha mesa redonda e actividades ao aire libre durante unha mañá.

O 36º Congreso Nacional de Diabetes poñerá o foco nos principais retos e avances no manexo da diabetes tipo 1 e a diabetes tipo 2, así como as súas complicacións; pero tamén abordará novas dianas terapéuticas, a rexeneración do páncreas, as barreiras en insulinoterapia ou a incorporación da Intelixencia Artificial (IA) na diabetes, entre outros.

O contido científico está organizado en tres itinerarios diferenciados (científico, clínico-formativo e psicoeducativo) con mesas redondas, sesións de comunicacións orais ou encontros con expertos. Tamén haberá zona de networking e cursos pre e post congreso.

A Coruña, cidade referente no turismo MICE

A cidade segue en primeira posición en canto ao turismo de convencións, reunións ou congresos, máis coñecido como MICE. O Goberno de Inés Rey vén apostando desde o 2019 polo fomento deste tipo de turismo, albergando na urbe congresos ou foros nacionais coma este. Durante os próximos meses, ademais, hai programados varios congresos como o da Sociedade Española de Rehabilitación e Medicina Física (SERMEF), o da Sociedade Española de Epilepsia, Ecosystems ou Mundos Dixitais.