A exposición ao aire libre dedicada á Antonio Fraguas, Forges, da este xoves comezo á programación da quinta edición do Encontro Mundial de Humorismo, que transcorrerá en diferentes espazos da cidade ata o vindeiro 4 de maio, con máis de 15.000 entradas vendidas para os numerosos espectáculos programados. A alcaldesa, Inés Rey, visitou esta mañá a mostra 'Guonderful Forges. Os anos da esperanza' acompañada do comisario da mesma, Juan Herrera, un dos grandes referentes do humor a nivel nacional, responsable de formatos como Humor Amarillo ou El Hormiguero. Tamén asistiu Luis Piedrahita que, xunto con Ximena Feijoo Merklen, é o director artístico da mostra.

"Desde o Concello da Coruña seguiremos a apostar por iniciativas culturais que enriquezan o espazo público, que inviten á reflexión e que nos fagan mellores como sociedade", apuntou a alcaldesa durante a visita. A mostra, dedicada a un dos humoristas gráficos máis relevantes da historia de España, percorre a obra de Forges a través das súas viñetas publicadas entre o final da ditadura e a chegada da democracia. A morte de Franco, a situación política, os medios de comunicación, a liberdade de expresión, os estatutos de autonomía, o turismo, a música, o deporte, a pílula anticonceptiva, a Igrexa, a parella ou o cine e a televisión son algunhas das temáticas que Forges abordou nas súas viñetas, nas que exerceu como cronista da súa época cun humor lúcido e comprometido.

Juan Herrera asina tamén o texto de presentación da mostra: "As ditaduras, como as hipotecas variables, sábese cando empezan, pero non como rematan. Non hai un anemómetro que mida a brisa da liberdade e quizais o humor sexa a única ferramenta capaz de facelo. Fronte ao medo e á represión, só queda o voo intrépido das paxariñas de papel dos humoristas. Entre eles, Forges destacaba como unha voz única e esencial".

Comeza o EMHU

As principais figuras e espectáculos do momento da comedia daranse cita na Coruña ao longo de 11 xornadas. Shows de estrea, mesas redondas, producións propias e proxeccións conforman un programa do que o público poderá gozar esta primavera.

O Encontro Mundial de Humorismo xa colgou o cartel de "entradas esgotadas" en practicamente todas as súas sesións, pero conta con actividades paralelas de acceso libre ata completar aforo -como o Match de Impro, a presentación de Atasco, a charla Castelao na arte europea ou o podcast El sentido de la birra Live- que terán lugar na sede de Afundación (Cantón Grande). Estas actividades intégranse no programa Cultura por Alimentos, unha iniciativa solidaria que invita ás persoas asistentes a facer unha achega simbólica de alimentos non perecedoiros, que se destinarán ao Banco de Alimentos Rías Altas.

PROGRAMACIÓN COMPLETA DE EMHU 2025

• 24/04 a 04/05 | Cantón Grande | Guonderful Forges. Os anos da esperanza

• 24/04 | Teatro Colón | Lucho Mellera (esgotado)
• 25/04 | Teatro Colón | Apocalípticamente correcto, con Luis Piedrahita (esgotado)
• 26/04 | Sede Afundación | Match de Impro, con A Escola de Impro (entrada libre)
• 26/04 | Teatro Colón | Playa de Lobos, encontro con Javier Veiga e Marta Hazas
• 26/04 | Palacio da Ópera | La Chochoctora, con Henar Álvarez (esgotado)
• 27/04 | Teatro Colón | Grito, con Hovik (últimas entradas)
• 28/04 | Sede Afundación | Presentación da segunda tempada de Atasco (entrada libre)
• 29/04 | Sede Afundación | Charla Castelao na arte europea (entrada libre)
• 30/04 | Sede Afundación | El sentido de la birra Live (entrada libre)
• 30/04 e 01/05 | Teatro Colón | Esto no es un show, con Galder Varas (esgotado)
• 01 e 02/05 | Teatro Colón | 17 veces, con Faemino y Cansado (esgotado)
• 02/05 | Teatro Colón | Anatomía del Humor, con Santaolalla, Crespo, Piedrahita, González de Vega e Rocío Vidal (invitacións esgotadas)
• 02/05 | Sede Afundación | Tlatoani, con Carlos Ballarta (últimas entradas)
• 03/05 | Teatro Colón | SHOW 1995, con Franco Escamilla (esgotado)
• 03/05 | Palexco | La Ruina e Humoris Causa, con Carlos Blanco, Goyo Jiménez, Marta González de Vega e Xosé A. Touriñán (esgotado)
• 04/05 | Teatro Colón | Fantastic Colofón, con Álex Clavero, Ana Morgade e JJ Vaquero (esgotado)